वैदेशिक रोजगारीमा गएका नेपालीहरूले आफ्नो स्वास्थ्यमा ध्यान दिनु अत्यन्त जरुरी छ । धन कमाउने र करीअर बनाउने धुनमा आफ्नो स्वास्थ्य बिग्रिएको पत्तो नपाइन सक्छ । आफ्नो स्वास्थ्यलाई ध्यान दिंदा आफ्नो मात्र फाइदा नभई परिवारलाई पनि टेवा मिल्छ । विदेशमा काम गर्दा नेपालीहरू प्रायः कठिन शारीरिक श्रममा संलग्न हुने, कामको थकान, परिवारसँग टाढा रहेको कारण आफ्नो ख्याल गरिदिने मान्छेको अभाव हुँदा स्वास्थ्य क्रमश बिग्रदै जाने, मानसिक रुपमा समस्या र दीर्घकालीन रोगको समेत जोखिम उच्च हुन्छ। नयाँ वातावरण, फरक मौसम र असन्तुलित खानपानले उनीहरूको शारीरिक स्वास्थ्यमा प्रतिकूल असर पार्न सक्छ । विशेषगरी विदेशी मुलुकमा सफा पानी र पौष्टिक आहारको अभावले पेट सम्बन्धी समस्या, डिहाइड्रेसन र अन्य संक्रमणको जोखिम बढ्न सक्छ । यस्तै, घरपरिवारबाट टाढा रहँदा धेरैजसो श्रमिकहरूले मानसिक तनाव, एक्लोपन र डिप्रेसन अनुभव गर्छन्, जसले उनीहरूको कार्यक्षमता र आत्मविश्वासलाई कमजोर बनाउन सक्छ । यदी स्वास्थ्यमा ध्यान दिइएन भने बिरामी परेर काम गुम्ने र उपचारका लागि ठूलो आर्थिक भार खेप्नुपर्ने स्थिति आउन सक्छ । विदेशी मुलुकमा स्वास्थ्य सेवाहरू महँगो र पहुँचमा कठिन हुने भएकाले आफ्नो स्वास्थ्यको राम्रो ख्याल राख्नु आवश्यक हुन्छ । पर्याप्त व्यायाम, स्वस्थकर आहार, नियमित स्वास्थ्य परीक्षण र काम गर्दा सुरक्षाका उपायहरूको पालना गर्न सक्ने हो भने विदेशमा रहेका श्रमिकहरूले आफ्नो स्वास्थ्यलाई सुदृढ बनाउन सक्छन् । साथै, मानसिक स्वास्थ्यलाई सुदृढ राख्न परिवारसँग निरन्तर सम्पर्कमा रहनु र व्यक्तिगत तनाव व्यवस्थापन गर्न ध्यान दिनु आवश्यक छ । स्वास्थ्य राम्रो रह्यो भने मात्र विदेशमा आफ्नो आर्थिक लक्ष्य पूरा गर्न सकिन्छ भन्ने कुरा भुल्नु हुँदैन । स्वास्थ्यलाई प्राथमिकतामा राखेर श्रम गर्नु पर्छ । आफूले नसक्ने काम गर्न सक्छु भनेर जबर्जस्ति गर्ने, लामो समयसम्म नसुतेर ओभरटाइमको लोभमा काम गर्ने गर्नु हुँदैन । स्वास्थ्य राम्रो छ त सबै राम्रो हुने हो भन्ने कुरा बुझेर काम गर्नुपर्छ । प्रसस्त पानी पिउन तथा पौष्टिक युक्त खानपानमा विशेष ध्यान दिनुपर्छ ।